Taliskii Qaraxyada Ee Al-Shabaab Ku Lahaayeen Deegaanada Jubbada Hoose Oo La Burburiyey

Beerxaani, June 23, 2022 (Haatufonline) – Wararka ka imanaya deegaanada Jubadda Hoose ayaa sheegaya in howl-gal qorsheysan oo ay qaadeen Kumaandooska DANAB iyo Ciidanka Hay’adda Sirdoonka iyo Nabadsugida Jubbaland lagu burburiyey taliskii qaraxyada kooxfa Al-Shabaab ay ku lahayd deegaano ka tirsan gobolka Jubbada Hoose.

Howl-galkan lagu bartilmaameedsaday taliskii qaraxyada ee kooxda Al-Shabaab ayaa ka dhacay deegaanada Beerxaani, Qudus, Dharkeyn Urur, Yaaq-dabayl iyo Barjalla ee gobolka Jubbada hoose.

Waxaana Sidoo kale lagu dilay xubno ka tirsan Al-Shabaab, iyada oo gacantana lagu dhigay maadooyinkii iyo walxihii ay u isticmaalayeen samaynta qaraxyada isugu jira miinooyinka dhulka la galiyo iyo kuwa lagu xidho baabuurta iyo guryaha.

Saraakiisha howl-galkan hoggaaminayay waxay sheegen in lagu qabtay Afar Xubnood oo ka tirsan Al-Shabaab, kuwaas oo aruurinayey lacagaha ay Al-Shabaab ugu yeeraan sakawaadka, hub iyo gaari ay doonayeen inay u adeegsadaan qarax ismiidaamin ah.

Dhinaca kale Waxa la xaqiijiyey in kooxda Alshabaab dagaalkii Baxdo ka dhacay todobaadkii hore lagaga dilay sadex ka mid ah saraakiil sar sare oo ka tirsanaa cidankooda Jabhadda.