Al-Shabaab Oo Khasaare Ka Soo Gaadhay Dagaal Culus Oo Maanta Ka Dhacay Deegaanka Qaayib Ee G/Galguduud

Dhuusamareeb, November 7, 2022 (Haatufonline) – Wasiirka wasaaradda warfaafinta dowlad goboleedka Galmudug, Axmed Shir Falgale ayaa sheegay inay 15 dagaalyahan ay Al-shabaab kaga dileen dagaal culus oo maanta ka dhacay deegaanka Qaayib oo ka tirsan gobolka Galguduud.
Dagaalka oo ahaa mid xoogan ayaa ku billowday qaraxyo ismiidaamin ah, waxaana xigay dagaal toos ah oo u dhexeeyey ciidamada daraawiishta maamulka Galmudug oo garab ka helaya kuwa deegaanka iyo xoogaga Al-Shabaab ee weerarka ku qaaday halkaasi.
Falagle ayaa shaaca ka qaaday in ciidamada huwanta ay iska difaaceen weerar uga yimid Al-Shabaab, islamarkaana khasaare xoogan lagu gaarsiiyey dagaalkaasi.
Wasiirka ayaa sidoo kale xaqiijiyey in ugu yaraan illaa 15 xubnood Al-Shabaab looga dilay dagaalkaas iyo weerarka horreeyey, sida uu hadalka u dhigay.
“Baabuurtii ay wateen waan gubnay maydka wuxuu maran yahay illaa 20 KM. Maydka rasmiga ah ee Qaayib la’isugu keenay 15 illaa 16 weeyaan,” ayuu yiri wasiir Falagle