Khasaaraha Dagaal Ka Dhacay Laascaanood Iyo Ciidamo Wata Saanad Oo ka Soo Goostay Huwanta

Laascaanood, August 22, 2023 (Haatufonline) – Dagaal xoogan oo bilaabmay 6:00 subaxnimo ilaa 4:00 galabnimo ee maanta ayaa ka dhacay maagaalada Laascaanood.
Dagaalkan ayaa u dhexeeyey ciidamada Qaranka Somaliland iyo kooxaha Huwanta/Argagixisada ee ku sugan Laascaanood.
Weerar kooxaha Huwantu ay ku soo qaadeen fadhiisimada Ciidanka Qaranka ee Xargaga galbeedka magaalada, dhinaca Maraaga, Buurta Sayidka, Madaarka Magaalada ayaa dhamaanba lagu jabiyey Huwanta Puntaland iyo Argagixisada isa soo bahaystay.
Dagaalkan oo khasaare badan lagu gaadhsiiyey Huwanta ayaa lagaga gubay gaadiid tiro badan oo tab gaadhi ah, waxaa jira maxaabiis laga qabtay inkastoo aan la ogayn dhimashada. Dawladda JSL oo ka hadashay dagaal kooxaha Huwanta ah oo kaashanaya maamulka Puntland ee Somaliya ayaa dagaal ku soo qaaday fadhiisimada ciidanka Qaranka JSL. Warsaxaafadeed laga soo saaray Wasaaradda Gaashaandhiga ayaa lagu cambaareeyey dagaalkaasi.
Dhinaca kale Ciidamo wata saanad ciidan oo dhamaystiran ayaa ka soo goostay kooxaha Huwanta ah ee ka dagaalamaya magaalada Laascanood. Waxaana halkaasi ku soo dhaweeyay saraakiisha ciidanka Qaranka, gaar ahaan ciidanka qaybta 7aad.