3 Dagaalyahan Oo Shalay Kasoo Goostay #Alshabasb Iyo 3 Xalay Lagu Qabtay Xamar

Bakool, November 29, 2021 (Haatufonline) – Saddex xubnood oo ka tirsan ururka Alshabaab ayaa isa soo dhiibay, maalintii shalay.

Sadexdan dagaalyahan ayaa isku soo dhiibay ciidamada dawlad deegaanka Koonfur Galbeed ee Soomaaliya ee ka hawlgala degmada Waajid ee gobolka Bakool.

Hase yeeshee waxay wararku sheegayaan in dagaalyahanadani ay xidhiidh lasoo sameeyeen Ciidamada una sheegeen inay ka tanaasuleen fikirkii Argagixisonimo ee ay aaminsanaayeen, sidaana ay ugu soo gacan galeen ciidamada.

Mudooyinkii u dambeeyey waxa soo badanayey tirada dagaalyahanada ka soo goosanaya ururka Argagixisada ee Al-shabaab ee ku sugan gobolada Bay iyo Bakool kuwaasoo u badan dhalinyaro kasoo jeeda beelaha Digil iyo Mirifle ee ku hadla luqadda Maayga.

Dhinaca kale waxa isla xalay magaalada Muqdisho lagu dhex qabtay sadex ka mid ah xubnaha Alshabaab iyo agab laga sameeyo qaraxyada oo yaalay goobtii lagu qabtay sadexda argagixiso.