Beesha Surre ee Direed Oo Soo Kordhisay Ciidan Xoogleh Oo Ka Qaybgalaya La-dagaalanka Khawaarijta

Qalaanqale,August 22,2023(Haatufonline)- Beesha Surre ee Direed ayaa ciidan xoogleh oo loogu talogalay la dagaalanka Alshabasb kusoo bandhigtay Qalaaqale oo ka tirsan degmada Xeraale ee ku taala badhtamaha gobolka Galguduud.
Ciidankan oo tiradiisa lagu qiyaasay 2500 isla markaana ku hubaysan gaadiid tekniko ah oo ay kamid yihiin Shilkoyaal iyo gawaadhida gaashaaman ee Beebeeyada ayaa la filayaa inay kusoo biiraan ilaa 500 nin oo hubaysan oo ka tirsan beesha Qubays ee Direed ka hor intaan ciidanka dhammaantood loo qaadin dhinaca faroomaha dagaalka.
Siday odeyaal ka tirsan beesha Direed sheegeen waxa ciidan beeleedka lasoo ururiyey ka mid ah ruugcadeyaal kasoo qaybgalay dagaaladii ay beeshu la gashay Khawaarijta Alshabaab kuwaas oo ahaa kuwii ugu horeeyey ee ciidan macawislay ahi ku qaado Argagixisada Alshabaab. Odeyaashu waxa kale oo ay sheegeen in beesha Surre ay ciidan kale hore u gaysay caasimadda Galmudug ee Dhusamarreb.