Madaxweynaha La Doortay Ee Somaliland Oo La Kulmay Weftiga Uu Hoggaaminayo Safiirka Maraykanka

Hargeysa, December 3, 2024 (Haatufonline) -Madaxweynaha la doortay ee Jamhuuriyadda Somaliland Dr. Cabdiraxmaan Maxamed Cabdilaahi (Cirro) ayaa la kulmay wefti ballaadhan oo uu hoggaaminayay Danjiraha dalka Mareykanka Danjire Richard H. Riley oo ay wehelinayaan taliyayaasha ciidamada AFRICOM.

Madaxweynaha la doortay wuxuu sheegay inuu weftiga si qoto dheer uga wada hadleen sidii loo sii xoojin lahaa xidhiidhka ka dhexeeya Jamhuuriyadda Somaliland iyo dalweynaha Mareykan.

Madaxweyne Cabdiraxmaan Cirro wuxuu xusay in weftigu soo gaadhsiiyeen dhambaal hambalyo ah oo ay uga sideen dawladda Maraykanka. Madaxweynaha la doortay wuxuu xusay in Doorashooyinkii Jamhuuriyadda Somaliland ka dhacay 13kii Nov, ay noqdeen doorashooyin indhaha caalamka si weyn ugu soo jeedisay JSL, isla markaana u soo jiidi doonaan fursado maalgashi oo caalami ah.