Madaxweyne Farmaajo Oo Saxeexay Sharciga Duulista Rayidka Soomaaliya, Una Magacaabay Maareeye

Muqdisho, June 22, 2020 (Haatuf) – Madaxweynaha Dawlada Federalka ee Soomaaliya Maxamed Cabdillaahi Farmaajo ayaa saxeexay Sharciga Duulista Rayidka oo ay hore usoo ansixiyeen Golaha Shacabka iyo Aqalka Sare ee Baarlamaanka Soomaaliya.

Madaxweynaha ayaa Guddoonka Labada Aqal ee Baarlamanka Federaalka Soomaaliya, Golaha Xukuumadda, Xildhibaannada iyo dhammaan khubaradii Soomaaliyeed ee qaybta ka qaatay uga mahadceliyey dadaalka ay galiyeen sharcigan dhaxal reebka ah.

Dhanka kale, Madaxweyne Farmaajo ayaa u magacaabay Maareeyaha Guud ee Hay’adda Duulista Rayidka Mudane Axmed Macalin Xasan.

Mudane Axmed Macalin Xasan ayaa aqoon iyo waaya-aragnimo dheer u leh Hay’adda Duulista Rayidka ee Soomaaliya. Wuxuuna shahaada Mastarka ka qaatay Jaamacadda London Metropolitan isaga oo ku taqasusay Maamulka iyo Maareynta Duulista (Aviation Management).

Sharciga Duulista Rayidka Hawada ayaa kamid ah sharciyadii dalka ka maqnaa tan iyo markii ay meesha ka baxday dowladdii dhexe ee Soomaaliya, waana sharci Soomaaliya awood usiinaya diiwaan gelinta dayaaradaha, qaadashada shatiga duulista (Pilot licenses), shahaadada farsamada dayuuradaha iyo shahaadada garoomada Soomaaliya.

Qaar kamid ah dowlad goboleedyada ayaa sharcigaan horey ugasoo horjeestay iyagoo u aaneeyay in aan wada-tashiyo laga siinin, maadaama uu dalka federalka yahay islamarkaana uu si toos ah u saameynayo dalkoo idil.