Masiibo Deegaan Oo Ka Dhalan Karta Taankar Uu Xuuthigu Ku Gubay Badda Cas

Haatufonline,August 31,2024

Waxa walaac wayn laga qabaa waxyeelo balaadhan oo deegaanka Badda Cas iyo Gacanka Berbera kasoo gaadha taankar saliid siday oo Xuuthiyiintu badda ku gubeen 21 kii bishan .
Taankarkan oo lagu magacaabo Sounion lagana leeyahayna dalka Giriigga oo siday hal milyan oo foosto oo saliid caydhin ah ayaa waxa laga cabsi qabaa in saliidda ka qubanaysa ay ka dhalato masiibo deegaan oo aan hore loo arag baaxadeeda.
Xuuthiyiinta ayaa horjoogsaday oo soo celiyey taag isku dayey inuu taankarka gubanaya kasoo jiido badda.
Shalay ayey Xuuthiyiintu soo bandhigeen video borobogaandhe ah oo ay ka soo duubeen burburka soo gaadhay iyo ololka ka baxaya taankarka. Hasa yeeshee muuqaalada ay soo duubeen kumay muujin khankii uu shidaalku ku jiray.

Kooxda Xuuthiyiinta oo ay Iran taageerto ayaa ilaa bishi November ee sanakii hore wadday weeraro ay la beegsanayaan maraakiibta marta Badda Cas iyadoo ay ku andacoonayaan inay ugu hiilinayaan Falastiiniyiinta Qaza ee Israel dagaalka ku hayso.