Xuuthiyiita Oo Dagaal Ku Qaaday Agabka Lagu Xayeysiiyo Dharka Dumarka

Haatufonline,December 16,2024

Askar ka tirsan kooxda Xuuthiyiinta Yaman ayaa dhawaan suuqyada magaalada Sanca ka raafay agabka lagu xayeysiiyo dharka dumarka.
Askartan ayaa waxay jajabiyeen oo ay baabuur ku gurteen sanamyada caagga ah ee dukaanlaydu sudhaan dharka dumarka.
Xuuthiyiinta ayaa agabka ay raafeen ku tilmaamay mid wax u dhimaya anshaxa iyo dhaqanka Islaamiga ah.
Hasayeeshee tujaarta dharka ee suuqa Haayel ayaa ku cawday in iyadoon waxba loo sheegin ay askartu ka dul dageen dukaamadi dharka oo ay ulo bir ah ku jajabiyeen agabkii ay dharka ku xayeysiinayaan taasoo ay yidhaahdeen waxay fajac iyo amakaag ku ridday dadkii wax iibsanayey iyo kuwii suuqa marayeyba.
Qaar ka mid ah tujaarta suuqa caanka ah ee ku yaal wadada Jamaal ee badhtamaha magaalada Sanca ayaa talaabadan Xuuthiyiinta ku sifeeyey mid guracan iyadoo ay Xuuthiyiinta ku eedeeyeen inay u dhaqmayaan sidii ururka argagixisada ah ee Daacish.