Yoolka Iskaashiga Sadex Geesoodka Ah Ee U Dhaxeeya Alqaacida,Alshabaab iyo Xuuthiyiinta

Xuuthiyiinta Iyo Alshabaab waxa muddo dheer qoryaha ay rasaasta u kala iibin jiray Soomaalida ka ganacsata hubka, mana jirin xidhiidh toos ah oo labada kooxood u dhaxeey. Hasayeeshee kadib markii ay xuuthiyiintu dabayaaqadii sanadkii 2023 bilaabeen weerarada ay la beegsadaan markiibta marta Badda Cas ayaa waxa unkamay xidhiidho fool ku fool ah oo dhexmara wakiilo ka kala socda Xuuthiyiinta iyo Alshabaab.Xidhiidhkan oo ay ahayd Alqaacidada Yaman cidda dhiirigalisay inuu qabsoomo ayaa waxa ka dhashay iskaashi sadex geesood ah oo u dhaxeeya Xuuthiyiinta,Alqaacidada Yaman iyo Alshabaab oo ujeedadiisu tahay in weeraro militari iyo kuwa is-qarxin ah laga fuliyo Koonfurta Yaman,Somalia, Somaliland iyo Badda Cas,Gacanka Cadmeed iyo Galbeedka Badwaynta Hindiya iyadoo la bartilmaameedsanaayo:
1) Saldhigyada ciidamada Koonfurta Yaman gaar ahaan kuwa ku yaala gobolada Abyan iyo Shabwa iyo madaxda dhaqdhaqaaqa dib ula soo noqoshada madaxbanaanida Koonfurta Yaman.
2) Maraakiibta marta Badda Cas,Gacanka Cadmeed iyo galbeedka Badwaynta Hindiya
3) Saldhigyada ciidamada, hayadaha iyo madaxda dawladda iyo magaalooyinka Somalia
4) Madaxda iyo hayadaha dawladda iyo magaalooyinka Somaliland.

Sadexda dhinac mid walba waxa uu iskaashigan ka leeyahay ujeedo sidan ah:
-Xuuthiyiintu waxay dani ugu jirta inay daciifto dawladda Yaman ee Sucuudiga iyo Imaaraatku taageeraan oo ay Alqaacida la burburiso. Xuuthiyiintu waxa kale oo ay rabaan inay balaadhiyaan weerarada ay Maraakiibta la beegsadaan oo ay Alqaacida iyo Alshabaab arintaas wax kala qabtaan siiba hawlgalada is-qarxinta oo labadan urur argagixiso ku baasyihiin.
-Hubka yar yar iyo rasaasta ka sakow Alqaacidada Yaman iyo Alshabaab waxay Xuuthiyiinta ka helayaan hubka casriga ee ay Iiraan ku taakulayso sida diyaaradaha Daroonka ah,gantaalaha ridada dheer iyo gantaalaha lidka diyaaradaha ahba.

Ilaa hadda ma muuqdaan talaabooyin wax ku ool ah oo ay dawladaha mandaqadda iyo guud ahaanba beesha caalamku kaga hortagayaan khataraha kagasoo fool leh iskaashigan sadex geesoodka ah ee halista ku ah nabadgelyadooda iyo xasiloonidoodaba.